Við fjölskyldan brugðum okkur á kvikmyndasýningu í kvöld, en foreldrar mínir og systkini eru þessa dagana í opinberri heimsókn í Reykjavík. Myndin sem við horfðum á heitir „Knowing” eða „Vitandi” á móðurmálinu. Með aðalhlutverk fór sjálfur Cage. Myndin er kaflaskipt svo vægt sé tekið til orða. Hún var frábær meðan hún fjallaði um mann sem komst yfir 50 ára gamlan dulmálslykil í formi talnarunu sem sagði til um dagsetningu og staðsetningu stórra slysa og náttúruhamfara ásamt fjölda látinna fram í tímann – en var kjánaleg eftir að frásögnin breyttist í söguna um Örkina hans Nóa.
En ég ætla ekki að lýsa söguþræði myndarinnar, heldur þeim hugsunum sem flogið hafa um huga minn eftir að hafa horft á hana og ég á erfitt með að losa mig við. Hversu samhengislaust sem það nú er fékk hún mig til að hugsa um siðferðileg álitamál.
Sá lífsleikniáfangi úr MA sem mér fannst áhugaverðastur fjallaði um siðferðileg álitamál. Mig langar hér til að varpa fram nokkrum siðferðilegum álitamálum og biðja ykkur um að segja ykkar álit á þeim.
---
A)
Þú ert skurðlæknir. Til þín kemur maður með stórslasaða konu sína og biður þig um að hjálpa sér. Maðurinn útskýrir fyrir þér að þau hjónin séu í sértrúarsöfnuði sem leyfir ekki blóðgjafir og að þau trúi því að fólk sem taki við blóðgjöfum fari til helvítis þegar það deyr. Maðurinn tekur af þér loforð um að þú munir ekki gefa konunni blóð, sama hversu alvarleg staða hennar sé.
Þegar þú ert kominn inn á skurðstofuna gerir þú þér grein fyrir því að konan hefur misst svo mikið blóð að hún þurfi á blóðgjöf að halda til að lifa aðgerðina af.
Hvað gerir þú?
B)
Faðir þinn liggur dauðvona á spítala eftir langa og erfiða baráttu við krabbamein, en hann hafði reykt svo áratugum skipti. Þegar hann á einungis nokkra klukkutíma eftir ólifaða biður hann um að fá að tala við þig undir fjögur augu.
Hann segir við þig að það sé hans hinsta ósk að þú hættir að reykja og að það sé sér afar mikilvægt. Þú veist hins vegar að þú munt aldrei geta hætt að reykja og vilt fá að halda því áfram.
Hvað segir þú við pabba þinn?
C)
Samkvæmt íslenskum lögum er eftirfarandi starfsemi óheimil á Íslandi á föstudaginn langa:
„Skemmtanir, svo sem dansleikir eða einkasamkvæmi á opinberum veitingastöðum eða á öðrum stöðum sem almenningur hefur aðgang að. Hið sama gildir um opinberar sýningar og skemmtanir þar sem happdrætti, bingó eða önnur svipuð spil fara fram.”
Hvaða skoðun hefur þú á þessum lögum?
skip to main |
skip to sidebar
Höfundur
- Jan Eric Jessen
- Dvergagili 12
- 603 Akureyri
- Sími: 615 4433
4 comments:
Þetta er auðvelt. Maðurinn í fyrsta dæminu hefur engann rétt til að meina konu sinni að halda lífi og því mundi ég gefa konunni blóð. Í dæmi númer tvö mundi ég ljúga að pabba gamla. Hvít lygi er lítil samanborið við að veita gömlum manni frið á dánarbeðinu. Samviskubitið sem mundi síðan fylgja því að reykja þaðan af mundi kannski fá mig til að hætta. Þriðja dæmið er líka mjög auðvelt. Að ríkið haldi uppi kirkjunni og haldi uppi lögum sem skylda alla þegna ríkisins að fara eftir trúarreglum er augljóslega í andstöðu við trúfrelsi og því eiga þessi lög ekki rétt á sér.
um daginn fór ég i tíma í skólanum þar sem fyrsta dæmið var sem tekið fyrir:) ef konan er meðvidundarlaus og getur ekki tjáð vilja sinn í sambandi við blóðgjöf og ekki er til undirritað skjal þar sem hún afþakkar alla blóðgjöf þá á að gefa henni blóð. en ef hún er með fulla meðvitund og segist ekki vilja blóð þá verður læknir að virða vilja sjúklingsins.
annars svaraði rúnar þessu öllu ansi vel.
Sko ég held ég verði að vera ósammála fyrstu tveimur ræðumönnum hvað varðar fyrsta dæmið. Ef konan getur ekki svarað fyrir það sjálf hvort hún vilji blóð þá hefur eiginmaður hennar síðasta orðið um það, ef hann afþakkar það þá skal þar við sitja. Þó er ég ekki með lögin á hreinu í kringum þetta, eftilvill eru til lög sem myndu breyta einhverju, en sú trú að ekki megi taka við blóði annarar manneskju er eitthvað sem þessi hjón greinilega trúa af einlægni og það ber að virða og svo framarlega sem þeim sé fullljóst hvað muni gerast fái hún ekki blóð fá þau að taka ákvörðun um þetta en ekki læknirinn.
Hvað dæmi tvö varða þá er ég sammála því að hvít lygi sé mjög réttlætanleg í þessu samhengi.
Þriðja dæmið, þá er ég sammála því að þessi lög séu orðin úrelt. Mönnum þótti þau sjálfsögð hér á árum áður, en að mínu mati á að ríkja það frelsi að einstaklingur ákveður sjálfur hvað hann vill gera á hverjum degi, hvort sem það sé að spila bingo eða djamma langt fram á nótt. Þó ber að gæta þess að með engu móti sé hægt að neyða fólk til þess að vinna á þessum dögum.
Búbb, þetta er djúpt.
Ég verð samt fyrst að segja að ég skellti mér einmitt á Knowing eitt kvöldið. Mér fannst þetta skemmtileg mynd fyrir utan Nicholas Cage, hann er eiginlega bara b-leikari sem samt sem áður hefur komist mjög langt í kvikmyndabransanum. Hann var samt fínn í Con Air, Con Air er töffaramynd.
Ég er sammála Rúnari með þessi álitamál. Samt væri ég til í að vera í fríi um páska bara því það er svo mikið og gera og ég nenni ekkiaðvinna... en mér finnst allt í lagi að verslanir og slíkt séu lokaðar á þessum degi. Samt er ég ekki einu sinni trúuð. En mér finnst bara að fólk megi fá einn svona páskafrídag eða whatever, hvort sem það vilji fara með bæn og kveikja á kertum eða borða góðan kvöldmat með fjölskyldunni og slappa af.
Rokk og ról Janni
Post a Comment